PH 103 - Pilosopiya ng Relihiyon

Long test namin noong isang gabi sa Philosophy of Religion. Ito ang tanong:

"Kung sakaling magising ka isang umaga at nalaman mong wala naman pala talagang Diyos, magbabago ba ang iyong buhay?"

Ito ang sagot (conclusion part lang. Masyadong mahaba yung sagot ko e):

         "Malaking pagbabago ang mangyayari sa aking buhay kung sakaling magising ako isang umaga, at malaman kong wala naman pala talagang Diyos. Mag-iiba ang aking mga ideolohiya. Magbabago ang lahat ng aking mga pananaw sa mga bagay sa aking kapaligiran, may buhay man o wala. Maglalaho sa aking isipan ang imahe ng isang Ama na sa aki'y nagmamahal at kumakalinga. At sa aking paggising sa umagang iyon, kung wala naman pala talagang Diyos, ako'y magmimistulang isang batang ampon na namulat sa katotohanang wala talaga akong ama. Maihahalintulad sa isang gusali na nabuwal ang haligi at mga pundasyon. Marahil hindi iyon ang maging katapusan ng aking pag-iral, subalit panigurado na ang lahat ng aking mga kaisipan, paniniwala, at ideolohiya ay guguho at lalatag sa pinong pinong pagkadurog.

          Kung ang kahulugan ng aking pag-iral ay "Mula sa Diyos, Para sa Diyos," ano na lamang ang magiging saysay ng aking paghinga sa umagang wala naman pala talagang Diyos? Marahil ay bumalik ako sa kawalan, magbubuo ng panibagong pundasyon sa mga gumuhong kaisipan, magpapa-ampon sa panibagong ama na paniniwalaan, at maghahanap ng panibagong dahilan ng aking paggising sa susunod pang mga umaga." (Matienzo, 2014)